(一)我開分陀
我開分陀﹐主要原因係因為我近排玩返QQ。
既然玩得QQ﹐有個QQ空間﹐無奶油丟空佢。
QQ空間個blog﹐算係《Jonathan的江湖》嘅影子博客﹐不過入面內容﹐同sinablog呢個有些少唔同。
例如﹐係QQ空間﹐因為考慮到大陸奉行「中國特色社會主義」﹐所以絕對唔會討論時事。(笑)
之前﹐時常係度寫嘅「心情回憶」﹐由於有網友投訴內容太郁悶關係﹐所以日後所有「心情回憶」系列文章﹐都會係QQ空間入面發表。
仲有﹐係QQ空間分站﹐為照顧大陸同胞﹐避免傷害廣大中國人民感情﹐我只會用書面語(白話文)書寫。
如果有機會﹐我亦會將《無限復活》轉帖過去QQ空間。

另外﹐由於QQ空間疑似唔支援站外連結﹐大家如果想去我個QQ空間﹐方法如下﹕
(1)玩QQ﹐然後add我(我QQ號碼為﹕1405748760)。
(2)Cut & paste以下網址﹕
http://1405748760.qzone.qq.com/
然後貼上IE或Firefox嘅網址列﹐然後按enter。

(二)《無限復活》無故復活
正當一眾老友﹑網友﹑襯家﹐以為《無限復活》爛尾﹐因此而歡天喜地(或怨聲載道)之際
《無限復活》第二部曲《無限復活‧Ω》﹐正式宣佈無故復活。
話《無限復活》無故復活﹐原因係作為重要作者之一嘅文少﹐即係我﹐原本已經諗住唔再寫落去﹐令《無限復活》書如其名﹐成為「後現代玄幻奇情無厘頭廢話連篇爛尾小說」。

話《無限復活》無故復活﹐原因係作為原作作者嘅Malook﹐由於極度不滿文少掛住吃喝玩樂﹐而任由《無限復活》爛尾…於是係我寫《蘇永康三部曲》一刻﹐無故亂入﹐監粗加入《無限復活‧Ω》情節﹐令《蘇永康三部曲》變成《蘇永康三部曲の強勢復活》…

話《無限復活》無故復活﹐原因係Malook亂入《蘇永康三部曲》之後﹐文少怒剿Malook﹐指斥《蘇永康三部曲の強勢復活》同《無限復活‧Ω》情節出入太大﹐兩人重新探討《無限復活‧Ω》劇情﹐令《無限復活》編劇組強勢復活﹗﹗

話《無限復活》無故復活﹐原因係《無限復活》編劇組強勢復活之後﹐平日字都唔願打多隻嘅Malook﹐竟然坐言起行﹐動筆寫出第2﹑第3同第4章故事草稿…連Malook老婆都非常震驚﹐講出「Malook你好學唔學﹐學人寫小說」嘅評語﹗

正因如此﹐
由文少XMalook聯手打造﹐後現代玄幻奇情無厘頭廢話連篇爛尾小說《無限復活》﹕第二部〈無限復活‧Ωの蘇永康亂入版〉﹐正式無故復活﹗

基本上﹐〈蘇永康亂入版〉同〈無限復活Ω〉故事大方向﹐並無太大差異﹐都係講述《無限復活》第一男歹角——黃龍(邪惡版王瓏)成魔之謎﹗
〈蘇永康亂入版〉同〈無限復活Ω〉最大分別﹐在於《無限復活》終極歹角——竹國一雄博士﹐傳說中嘅路先生﹐提早正式登場…

各位觀眾﹐有請竹國一雄博士﹗﹗

竹國一雄博士
1967年出生於日本加賀﹐1989年於日本旱稻田大學取得機械工程學士學位﹐1992年於東京帝國大學取得機械工程碩士學位。
之後在短短三年間﹐便在1995年於英國帝國大學取得博士學位﹐主攻航天機械科技﹐之後返回旱稻田大學任教。
1998年﹐吳有冬博士發表『SEQ理論』﹐時空物理學取得重大理論突破﹐竹國一雄博士獲得英國殖民地部邀請﹐加入皇家香港科技大學時空物理學研究所﹐成為研究所的機械技術顧問﹐專門研究「平行世界穿梭器」開發工作。

究竟Ω世界﹐係一個點樣嘅世界﹖究竟原本被稱為「科學界新星」﹐擁有幸福生活嘅黃龍﹐點解會成為時空罪犯﹖究竟黃龍要不斷殺死唔同平衡宇宙嘅自己﹖黃龍成魔﹐又同竹國一雄博士有咩關係﹖點解竹國一雄就係路先生﹖路先生點解係《無限復活》終極歹角﹖路先生又係乜水﹖94327又係咩野﹖

大家請密切留意《無限復活》無故復活之作﹕〈無限復活‧Ωの蘇永康亂入版〉!

(三)Malook學人寫blog。
賣完一個廣告﹐唔爭在賣多個。
無錯﹐你無睇錯﹐就係我老表Malook﹐唔單只學人寫小說﹐仲學人寫blog﹗
無錯﹐就係因為《無限復活》無故復活﹐平日盲字都唔會寫多隻嘅Malook﹐竟然文興大發(誤)﹐學人寫Blog﹗
由於Malook新手上路﹐文少XMalook又再繼《無限復活》之後﹐再次攜手打造﹐製造Blog壇亂噏傳奇~~

Blog-9:Malook﹐除左有《無限復活》連載之外﹐仲有由Malook親手寫嘅《無限復活》草稿版!
Blog-9:Malook﹐除左有《無限復活》草稿版之外﹐仲有大量痴線故仔﹐以及廢話小說!
Blog-9:Malook﹐保證亂噏﹐真正痴線﹐苦練十年﹐強勢打造﹐上天下地﹐只此一間﹐絕無分店!

係咪好想睇呢﹖

想睇﹐你就自己死去睇﹐最好你地全部人過晒去﹐然後令呢度變鬼屋﹐唔好係我個地盤嘈喧巴閉﹐我就樂得清淨!

仲唔過去﹖作死呀﹐作死呀嘛﹖